حب عشرة حب مية

حب عشرة حب مية
بقلم
آمال محمود كحيل

موش هالومك ، أو أحاسبك
لو في يوم جه خانني قلبك
ولا حبيت حـــد تـــاني
ليه أكون وياك أنــاني
أو أطالبك توفي وعدك

حب عشــرة ، حـب ميـة
الحكـايـة ماهيش قضيــة
طول ما قادر تبقى عاشـق
يبقى خليــك سهم راشـــق
واوعى ترحم قلب حبك

الطبيـعي تخـــون وتغـــدر
مين على الإخلاص بيقدر
مين بيرفــض عطر وردة ؟
ولا نظرة ف عين بتنـده
يبقى ليه هازعل واعاتبك

موش هاقولك إيه حكايتي
ياللي كنت ف يوم مرايتي
قوللي إيه فايدة صراحتي
ولا فاكـــر هالقى راحــتي
لـو هاقـــول الذنب ذنبـــك

بس نفسي تحس مرة
إن جــوه القلب حسرة
وان فشلت ف يوم أكونلك
كل شيء ، أو حتى ضــلك
سيبني ذكرى ، جـوه قلبك

وافتكر لو لحظــة جرحي
اللي داب في أنينه فرحي
وان حـبي لك حــقيقـــة
موش هايفتـر لو دقيقة
مهما قلبي عانى صدك

بادعي ربي وقلبي صافي
يـــوم تقـــابل حضن دافي
تطفي ويــــاه نـــار حنينك
تنسى وياه شوق ســـنينك
واللي كان ليك إنت وحدك
واللي كان
ليك إنت
وحدك

من طرف **ماهر حامد** الجمعة 12 مارس 2010, 10:27 am

اعاتبك واقولك

بحبك بكلك

بشكك وغدرك

وارجع اعاتبك

واخد بخاطرك

لانك زمانى

هيامى وحنانى

ياوردى يافلى

دكتورة آمال كل التقدير
والحب

من طرف **وفاء كحيل** الجمعة 12 مارس 2010, 8:15 pm

حب زي ما انت عاوز
ومش مهم بتحب مين
كنت فاكراك قلب طيب
لحبي .. ومخلص أمين
حب أكتر .. حب زود
دا انت قلبك بألف لون
ومعادش يفرق إنك بتبعد
ولا حتى تروح لمين
وافتكر كدبك يوماتي
عالمحبة والحنين
وافتكر انك بديت
بالأسية أما بحت بكلمتين
كنت عاوزني اصبر
ولا اداريك بدمعتين
قلبي وطول عمره صابر
وكنت وياه مستنيين
موش مهم انك بتخدع
معدتش تسحرني نظرة عنيك
مش هتقدر تداري كسوفك
ولا تهرب من ضميرك
ما خلاص عرفنا كدبك
وخلاص وراحت عليك

من طرف **محمد الأنور** السبت 13 مارس 2010, 4:49 am

الله الله يادكتوره

غنائيّة جميلة صادقة
من بحر الرمل
كلام موزون
وفيه مضمون
رقة وعذوبة وحنان
ولوعة ولهفة
جمال ودلال
ســـــهر وحنين
شـــــوق وعذاب
صفاء وكبرياء
الله عليكى
والله لاأجاملك
ـــــــــــــــــــــ
فى انتظار جديدك دائماً
الشـــــاعر محمد الأنور

حب عشرة حب مية

حب عشرة حب مية

رد: حب عشرة حب مية

رد: حب عشرة حب مية

رد: حب عشرة حب مية